प्रतिनिधी : राजेश चौधरी | प्रदीप कुळकर्णी

जळगाव जिल्ह्यातील सावदा शहरात एका सरकारी शाळेतील शिक्षकाची धक्कादायक शक्कल समोर आली आहे. या शिक्षकाने लिंगबदल करून निवडणुक कर्तव्य फसवण्याचा प्रयत्न केला आहे. पुरुष असूनही त्यांनी कागदोपत्री स्वतःच्या नावापुढे 'सौ' लावले असून, यामुळे प्रशासनाला गुंगारा देण्याचा त्यांचा उद्देश स्पष्ट आहे.

या बातमीचे प्रायोजक आहे.

या प्रकरणाने संपूर्ण जिल्ह्यात चर्चा आणि कुतूहल पैदा केले आहे, कारण निवडणूक कर्तव्य ही प्रत्येक शासकीय कर्मचाऱ्याची महत्त्वाची जबाबदारी आहे. शिक्षकांच्या या अनोख्या कृत्यामुळे लोकांमध्ये संताप आणि आश्चर्य दोन्ही व्यक्त करण्यात येत आहेत.

नेमका प्रकार काय आहे ?

मिळालेल्या माहितीनुसार, संबंधित शिक्षकाने निवडणूक आयोगाच्या माहिती प्रणालीमध्ये स्वतःच्या नावाचा उल्लेख करताना नावापुढे ‘सौ’ असे जोडले. यामुळे यंत्रणेला तो पुरुष नसून महिला असल्याचा भास झाला. केवळ लिंग बदलूनच हा प्रकार थांबला नाही, तर या महाभागाने स्वतःच्या नावासमोर ‘BLO’ (Booth Level Officer) अशीही नोंद केली आहे. विशेष म्हणजे, प्रशासनाकडून त्यांना अधिकृतपणे अशी कोणतीही जबाबदारी देण्यात आलेली नाही.

अशी लढवली शक्कल :

निवडणूक प्रक्रियेत सहसा BLO म्हणून कार्यरत असलेल्या कर्मचाऱ्यांना इतर कठीण निवडणूक ड्युटीतून सवलत मिळण्याची शक्यता असते. याच तांत्रिक बाबीचा गैरफायदा घेण्यासाठी संबंधित शिक्षकाने हा बनाव रचल्याचे बोलले जात आहे. कर्तव्य टाळण्यासाठी थेट स्वतःची ओळख बदलण्याच्या या प्रकारामुळे शिक्षक वर्तुळातून तीव्र संताप व्यक्त होत आहे.

प्रशासकीय यंत्रणेवर प्रश्नचिन्ह :

एका शिक्षकाने इतक्या उघडपणे माहितीमध्ये फेरफार करूनही प्रशासनाच्या पडताळणी प्रक्रियेत हा प्रकार कसा काय सुटला? असा गंभीर प्रश्न आता उपस्थित होत आहे. या प्रकाराला कोणाचे पाठबळ आहे का, याचीही चर्चा आता रंगू लागली आहे.

कारवाईची मागणी :

निवडणूक ही लोकशाहीचा अत्यंत महत्त्वाचा कणा आहे. अशा परिस्थितीत जबाबदार पदावर असलेल्या शिक्षकानेच यंत्रणेची फसवणूक करणे हे अत्यंत निंदनीय आहे. जर अशा प्रकारांकडे दुर्लक्ष केले, तर इतर कर्मचाऱ्यांमध्ये चुकीचा संदेश जाऊ शकतो. त्यामुळे या प्रकरणाची सखोल चौकशी करून संबंधित शिक्षकावर कठोर प्रशासकीय कारवाई करण्याची मागणी नागरिक करत आहेत.

या बातमीचे प्रायोजक आहे.